Musk akanusha madai ya NYT kuhusu dawa za kulevya

Gazeti hilo limedai kuwa bilionea huyo alizoea kutumia ketamine na pia alitumia ecstasy na uyoga wa kulevya. 

Elon Musk amekanusha madai ya kutumia dawa za kulevya baada ya ripoti ya New York Times kudai kuwa alitumia kwa kiasi kikubwa dawa zilizodhibitiwa wakati wa kampeni ya urais ya Donald Trump ya mwaka 2024.

Ijumaa, NYT ilichapisha makala ikidai kuwa Musk alikuwa akitumia dawa hizo “kwa kiwango kikubwa zaidi kuliko ilivyofahamika awali.”

Lakini Jumamosi, kupitia mtandao wa X (zamani Twitter), Musk alikanusha madai hayo akisema: “Ili kuweka wazi, SITUMII dawa za kulevya! The New York Times walikuwa wanaeneza uongo kabisa.”

Aliongeza kuwa aliwahi kutumia ketamine ya kuandikiwa na daktari miaka michache iliyopita na tayari alikuwa amewahi kufichua hilo hadharani. “Hili siyo jambo jipya. Ketamine ilisaidia kujitoa kwenye hali ya kiakili ya giza, lakini sijawahi kuitumia tena tangu wakati huo,” alisisitiza.

New York Times ilidai kuwa Elon Musk alitumia ketamine kwa kiasi kikubwa kiasi kwamba ilianza kuathiri kibofu chake, jambo linalojulikana hutokea kwa watumiaji wa muda mrefu. Makala hiyo pia ilidai, kwa mujibu wa vyanzo vya karibu, kwamba Musk alitumia ecstasy na uyoga wa kulevya, na alikuwa akisafiri na kisanduku cha dawa za kila siku chenye vidonge kama 20, ikiwemo Adderall – dawa ya kuchochea akili.

NYT haikufahamika wazi kama Musk alikuwa akitumia dawa hizo wakati alipoteuliwa kuongoza Idara ya Ufanisi wa Serikali (DOGE) chini ya utawala wa Trump, iliyokuwa na jukumu la kupunguza urasimu serikalini. Hata hivyo, iliripoti kuwa wakati wa utumishi wake wa umma, Musk alionyesha tabia zisizoeleweka, aliwatukana mawaziri, na wakati mmoja alifanya ishara tata iliyotafsiriwa na wengi kama saluti ya Kinazi.

Alhamisi, Musk alitangaza kujiuzulu nafasi yake serikalini, akimshukuru Trump kwa nafasi hiyo na kusema kuwa DOGE itaendelea na shughuli zake.

Ingawa Trump alisema Musk "haondoki kabisa" na atakuwa anarudi na kwenda, tangazo hilo lilitolewa wakati kukiwa na ripoti nyingi za mvutano kati ya Musk na maafisa wa serikali.

Mwezi Machi, NYT iliripoti kuwa Musk aliingia kwenye mvutano na Waziri wa Mambo ya Nje Marco Rubio kuhusu kufukuzwa kwa wafanyakazi, na pia na Waziri wa Uchukuzi Sean Duffy kuhusu kanuni za udhibiti wa anga.

Hivi karibuni, Musk alieleza kutoridhishwa na mswada wa matumizi ya fedha wa Trump, akisema kuwa unaleta nakisi kubwa ya bajeti na unahujumu malengo ya DOGE.