Rais wa Afrika Kusini yuko Marekani kwa ajili ya 'kuweka upya' uhusiano na Washington.

Rais wa Afrika Kusini, Cyril Ramaphosa, awasili Marekani kujaribu “kuweka upya” uhusiano na Washington

Rais wa Afrika Kusini, Cyril Ramaphosa, aliwasili Marekani siku ya Jumatatu, akitangulia mkutano wake wa Jumatano na Rais Donald Trump.

Ziara yake ya kitaifa inafanyika wakati ambapo uhusiano kati ya nchi yake na Washington uko katika hali mbaya zaidi kuwahi kushuhudiwa kwa miongo kadhaa.

Ramaphosa anatarajia kuweka upya na kuhuisha uhusiano wa pande mbili kati ya nchi hizo — hasa katika masuala ya biashara.

Tangu kurejea kwake madarakani, Trump amekata misaada yote ya kifedha kwa Afrika Kusini, kumfukuza balozi wa nchi hiyo, na kudai kwa uongo kuwa serikali ya Afrika Kusini inatekeleza mauaji ya halaiki dhidi ya Waafrika Kusini weupe wa kizazi cha Afrikaner.

Wiki iliyopita, Marekani iliwapokea kama wakimbizi Waafrika Kusini 59 weupe waliodai kuteswa katika nchi yao.

Ikulu ya Afrika Kusini imesema kuwa Ramaphosa atajadili “masuala ya pande mbili, kikanda, na ya kimataifa yenye umuhimu” na Trump.

Ramaphosa ameandamana na maafisa kadhaa wa serikali, wakiwemo Waziri wa Kilimo, John Steenhuisen, ambaye pia ni kiongozi wa chama cha Democratic Alliance, chama cha pili kwa ukubwa katika serikali ya umoja wa kitaifa.

Wakati akiwa Washington, Ramaphosa pia anatarajiwa kujadili fursa za biashara kwa kampuni za Elon Musk, mzaliwa wa Afrika Kusini, ambaye kwa sasa ni mshirika wa karibu na mshauri wa Trump.