Rais wa Afrika Kusini, Cyril Ramaphosa, anatarajiwa kukutana na Donald Trump nchini Marekani wiki ijayo

Uhusiano kati ya Afrika Kusini na Marekani umeendelea kuwa wa mvutano tangu Donald Trump alipoingia tena madarakani kama Rais wa Marekani. Chanzo kikuu cha mvutano huo ni mpango wa Marekani wa kuwapa hifadhi wakulima weupe wa Afrika Kusini, ambapo Trump anadai wananyanyaswa kwa misingi ya rangi. Afrika Kusini inakanusha madai hayo na inasema hakuna ushahidi wa mauaji ya kikabila dhidi ya wakulima weupe.

Mvutano huo ulizidi mwezi Machi baada ya Marekani kumfukuza balozi wa Afrika Kusini kutokana na kauli zake dhidi ya sera za utawala wa Trump.

Sasa, Rais Cyril Ramaphosa anatarajiwa kusafiri kwenda Marekani wiki ijayo kwa mazungumzo na Trump, huku suala la wakulima weupe na sheria za ardhi za Afrika Kusini likitarajiwa kuwa sehemu ya ajenda. Imebaki kuonekana kama mkutano huo utaweza kupunguza mvutano uliopo.