Mashambulizi ya ndege zisizo na rubani (drones) yaliyofanywa na kikundi cha wanamgambo wa Rapid Support Forces (RSF) yamesababisha kukatika kwa umeme katika mji mkuu

Hali ya usalama na maisha nchini Sudan imezidi kuwa mbaya baada ya mashambulizi mapya ya ndege zisizo na rubani (drones) yaliyofanywa na kikundi cha wanamgambo wa Rapid Support Forces (RSF). Mashambulizi hayo yalifanyika usiku wa kuamkia Jumatano na yalilenga vituo vya umeme katika mji mkuu Khartoum na maeneo ya jirani, hasa katika mji wa Omdurman. Kufuatia mashambulizi hayo, jiji la Khartoum na maeneo ya karibu yalibaki bila umeme hadi Alhamisi jioni, hali iliyoathiri pia upatikanaji wa maji na huduma nyingine muhimu.

Tukio hili limekuja wiki chache tu baada ya jeshi la Sudan kusherehekea kurejea kwa udhibiti wa jiji hilo, jambo ambalo sasa linaonekana kutishiwa na mabadiliko ya mbinu za kijeshi kutoka kwa RSF. Kwa sasa, RSF imeanza kutumia drones kushambulia kwa mbali miundombinu muhimu kama vituo vya umeme, mabwawa, na maeneo ya kimkakati yanayodhibitiwa na serikali ya kijeshi.

Aidha, RSF imeendeleza mashambulizi katika mji wa Port Sudan, ambao kwa muda mrefu umechukuliwa kama sehemu salama kwa maafisa wa serikali, wanadiplomasia, na mashirika ya misaada ya kibinadamu. Mashambulizi katika mji huo yameongeza hofu ya usalama katika eneo ambalo lilitegemewa kuwa makao salama wakati wa vita.

Vita kati ya jeshi la Sudan na RSF, ambavyo sasa vinaingia mwaka wa tatu, vimeleta maafa makubwa kwa raia. Takribani watu zaidi ya milioni 13 wamekimbia makazi yao, huku njaa kali na magonjwa hatari kama kipindupindu yakisambaa kwa kasi. Maelfu ya watu wamepoteza maisha kutokana na mapigano hayo.

Chanzo cha mzozo huu kilianzia kwenye mvutano wa kisiasa kuhusu mpango wa nchi hiyo kuhamia kwenye utawala wa kiraia, ambapo makundi ya kijeshi – yaani jeshi la Sudan na RSF – yalikosa kuelewana kuhusu nani angekuwa na mamlaka zaidi katika kipindi cha mpito. Tangu hapo, vita vya wenyewe kwa wenyewe vimekuwa vikizidi kushika kasi, sasa vikihusisha pia teknolojia mpya ya drones ambayo inaongeza hatari kwa raia na kuharibu miundombinu ya taifa.