Hamas yalaani wito wa mbunge wa Marekani wa kushambulia Gaza kwa silaha za nyuklia, ikiitaja kuwa ni uchochezi wa mauaji ya kimbari.

Vuguvugu la Mapambano la Kipalestina, Hamas, linalaani vikali matamshi ya hivi karibuni yaliyotolewa na Mbunge wa Chama cha Republican wa Marekani, Randy Fine, ambaye alipendekeza shambulio la nyuklia dhidi ya Ukanda wa Gaza, likiyataja kuwa ni matamshi yenye chuki kubwa na uchochezi wa wazi wa mauaji ya kimbari.

Katika taarifa iliyotolewa Ijumaa jioni, Hamas ilielezea matamshi hayo ya mbunge huyo kuwa ni “uhalifu kamili” na mfano dhahiri wa ubaguzi wa kifashisti unaotawala katika baadhi ya duru za kisiasa nchini Marekani.

Hamas ilizitaka serikali ya Marekani na Bunge lake kulaani hadharani matamshi hayo, ikisisitiza kuwa Bunge la Marekani limeendelea kujigeuza kuwa jukwaa la kuhalalisha na kutetea uhalifu wa Israel, hasa kwa kumpokea kwa heshima kubwa "mhalifu wa kivita" Benjamin Netanyahu.

Hamas ilieleza kuwa matamshi ya mbunge huyo wa Republican yanakiuka wazi sheria za kimataifa za kibinadamu pamoja na Mikataba ya Geneva, na ni uchochezi wa moja kwa moja wa matumizi ya silaha za maangamizi dhidi ya zaidi ya raia milioni mbili wa Gaza.

Vuguvugu hilo la mapambano lilihitimisha kwa kusema kuwa matakwa hayo ya kinyama hayatawavunja moyo Wapalestina wala kuyumbisha imani yao katika haki ya harakati yao. Badala yake, yanadhihirisha sura halisi ya utawala wa kikoloni wa Israel na wale wanaounga mkono utawala huo.

Jeshi la Israel lilianza tena mashambulizi ya mabomu dhidi ya Gaza mnamo Machi 18, likiua maelfu ya Wapalestina na kuwajeruhi wengine wengi, baada ya kuvunja makubaliano ya kusitisha mapigano ya miezi miwili kati yake na kundi la Kipalestina la Hamas, pamoja na makubaliano ya kubadilishana mateka wa Kiyahudi na waliotekwa kutoka upande wa Palestina.

Tangu Oktoba 7, 2023, angalau Wapalestina 53,822 wameuawa — wengi wao wakiwa wanawake na watoto — huku wengine 122,382 wakijeruhiwa katika mashambulizi ya kikatili ya kijeshi ya Israel dhidi ya Gaza.

Mahakama ya Kimataifa ya Uhalifu (ICC) ilitoa hati za kukamatwa mnamo Novemba iliyopita dhidi ya Waziri Mkuu wa Israel, Benjamin Netanyahu, na Waziri wa zamani wa Mambo ya Kijeshi, Yoav Gallant, kwa tuhuma za uhalifu wa kivita na uhalifu dhidi ya ubinadamu unaofanyika Gaza.

Israel pia inakabiliwa na kesi ya mauaji ya kimbari katika Mahakama ya Kimataifa ya Haki (ICJ) kutokana na vita vyake dhidi ya eneo la Gaza lililozingirwa.